Laudio, 2026ko uztailaren 13a. – Laudioko hainbat udal-instalaziotan legionella-maila altuak detektatzeak eta, ondorioz, ur-hornidura prebentzioz eteteak ezinegona sortu dute herritarren artean. Egoera horren aurrean, EAJ-PNVk EH-Bilduko Gobernu taldeari eskatu dio ahalik eta erantzukizun, seriotasun eta gardentasun handienarekin joka dezala, gertatutakoari buruzko azalpen argiak emanez eta bizilagunak zein udal taldeak jakinaren gainean mantenduz.

Alderdi jeltzalearen ustez, osasun publikoarekin zerikusia duen edozein intzidentziak zorroztasun teknikoan, gardentasun handienean eta herritarrekiko komunikazio bizkorrean oinarritutako kudeaketa eskatzen du. Horrelako egoeretan, funtsezkoa da informazio argia eta puntuala ematea, zalantzak saihesteko eta bizilagunen konfiantza bermatzeko. Testuinguru horretan, EAJ-PNVk uste du Udalak hasiera-hasieratik helarazi behar ziela eskura zuen informazio guztia udal-taldeei ere, garrantzi bereziko gai baten aurrean erantzun instituzional koordinatua emanez. "Benetan garrantzitsua da herritarrek ahalik eta informazio eta berme gehien izatea. Hain zuzen ere, horregatik uste dugu horrelako intzidentzia batek komunikazio instituzional osoa, jarraitua eta gardena eskatzen duela, bai auzokideekin, bai udal-talde guztiekin. Horrela bakarrik eman daiteke konfiantza, eta osasun publikoko kontu batek eskatzen duen koordinazioarekin jardun", adierazi du EAJ-PNVk.

Osasun publikoak informazioa eta gardentasuna eskatzen ditu

EAJ-PNVk azpimarratu du osasun-protokoloak aktibatzea eta prebentzio-neurriak hartzea direla horrelako intzidentzia bat detektatzen denean hartu beharreko erabakiak. Horregatik, hain zuzen ere, ezinbestekotzat jotzen du Udalak arazoaren norainokoari eta lanen bilakaerari buruzko informazio argia ematea. Udal Taldeak eskatzen du jakiteko noiz detektatu zen bakterioa, zer emaitza eman zituzten egindako kontrolek, zer desinfekzio-jarduketa egiten ari diren, erabiltzaileentzat arrisku gehigarriren bat dagoen eta zein epe aurreikusten diren kaltetutako instalazioetan normaltasuna berreskuratzeko.

Era berean, lanek irauten duten bitartean informazio iraunkorra eta eguneratua izatea eta edozein erabaki irizpide tekniko eta sanitarioei jarraituz hartzea eskatu du. "Herritarrek eskubidea dute jakiteko zer gertatzen ari den eta zer neurri hartzen ari diren beren segurtasuna babesteko. Lasaitasuna informazio egiazkoarekin, osoarekin eta puntualarekin ere transmititzen da", nabarmendu du EAJ-PNVk.

Prebentzio eta berme handiena laudioar herritarrentzat

Jeltzaleek espero dute hasitako jarduketek aukera emango dutela eragina ahalik eta lasterren konpontzeko eta beste udal-instalazio batzuetan eraginik ez izateko. "Beharrezko prebentzio-neurri guztiak hartzea, beharrezko analisi guztiak egitea eta osasun-berme guztiak izan arte instalaziorik berriro ez irekitzea espero dugu. Osasun publikoarekin lotutako gai batean ezin da inprobisaziorako tarterik egon", dio alderdiak.

Azkenik, EAJ-PNVk berretsi du egoera horren jarraipena egiten jarraituko duela, eta EH-Bilduko gobernu-taldeari eskatu dio komunikazio arina eta gardena izan dezala prozesu osoan zehar. "Orain, erabiltzaileen segurtasuna bermatzea, jarduera tekniko guztiak osatzea eta herritarrak gardentasun osoz informatuta edukitzea da lehentasuna, instalazioak osasun-berme guztiekin berriro ireki ahal izan arte. Osasun publikoari dagokionez, ez dago inprobisaziorik, ezta zalantzarik ere", bukatu dute EAJ-PNVtik.