Laudio, 2025eko ekainaren 23a. – EAJ-PNVren Laudioko udal-taldeak EH-Bilduko gobernu-taldeak aurkeztutako kreditu-aldaketaren aurka bozkatu du, 8,5 milioi euroko balioarekin. Jeltzaleek salatu dutenez, espedientea "ezohiko osoko bilkurara iritsi da, astelehen honetan, bat-batean, aurretiazko negoziaziorik eta gardentasunik gabe, eta inbertsio estrategikoak gastu arruntaren justifikaziorik gabeko igoerarekin nahastuz".

Ander Añibarro EAJ-PNVren Udaleko bozeramaileak gogor kritikatu du EH-Bilduk jarraitutako prozedura, eta gogorarazi du espedientea "gauetik goizera" deitu zutela ezohiko eta premiazko batzorde baten bidez, oposizioari proposamena sakon aztertzeko aukerarik eman gabe. "Gobernu taldeak bere jarrera despotikoa erabili du berriro ere adostasunik eta azalpenik gabeko erabaki sakonak inposatzeko. Horrela ezin da udalerri bat gobernatu ", adierazi du.

Beharrezko inbertsioak bai, baina ez gastu arduragabea handitzea

Aldaketak 4,5 milioi euroko injekzioa planteatzen zuen Udalaren Lurzoru Ondaretik Antzokiarentzat eta beste 4 milioi ohiko geldikinarentzat, milioi bat Antzokiarentzat, 600.000 euro Alberto Aceroren merkatuaren eraikina desjabetzeko, 350.000 euro Hornidura Plazako obrarentzat, eta 2 milioi gehiago gastu arruntean, ehun partida baino gehiagotan banatzeko.

"EAJ-PNVk argi eta garbi esan du Laudiorako inbertsio estrategikoak babesten ditugula, guk bultzatu genituelako Jaurlaritzatik aurreko agintaldian", azaldu du Añibarrok. "Baina ezin dugu gastu arruntean 2 milioi euroko igoera lagundu, aurretik gauzatutakoaren kontuak eman gabe. Gaur egun, Udalak ez ditu aurkeztu 2024ko judizioz kanpoko gastuak, eta ez du ordaindu enpresarik, udalerriko elkarterik edo Aiarako Kuadrilla bezalako erakunderik, 200.000 euro inguru zor baitzaizkio".

Añibarrok azpimarratu duenez, pilatutako zorra 2 milioi euro ingurukoa izan daiteke ordaindu gabeko fakturetan, eta "orain aurrekontua handitu nahi izatea, lehenik eta behin ordaintzeke dagoena agindu gabe, arduragabekeria da".

Talde jeltzaleak espedientea hainbat proposamenetan zatitzeko eskatu zuen dagokion batzordean: proposamen espezifiko bat inbertsio estrategikoetarako – EAJ-PNV baldintzarik gabe laguntzeko prest zegoena – eta beste bat, bereizita, gainerako gastuetarako. "Baina EH-Bilduk uko egin zion. Gaur osotasun bat edo ezer ez bozkatzera behartu gaituzte, eta horrela ez da udalerri bat ondo eraikitzen eta kudeatzen", deitoratu du bozeramaileak.

Añibarrok ohiz kanpoko osoko bilkuran emandako hitzaldiaren amaieran adierazi duenez, "gaur gobernu taldearen jarrera despotiko eta harroaren ondorio zuzenak ikusi ditugu. Hitz egiteko eseri eta udalerriarentzat garrantzitsuak diren gaiak negoziatu beharrean, zuzenean osoko bilkurara ekartzen dituzte, guztiok 'uztaitik pasatuko garela' onartuz, beraiek esaten dutelako. Ba ez. Gaur, gure botoarekin, ozen eta argi esan dugu ez dugula egingo".